2021 жылдың 20-26 сәуірінде пәндік олимпиадалар жүйесінде ерекше орын алатын оқушылардың химия пәні бойынша 55-ші Халықаралық Менделеев олимпиадасы өтті. Эпидемиологиялық жағдайға байланысты олимпиада онлайн режимде өтті.
Үздік жас химик атағы үшін бәсекелесуге ТМД, Балтық және Еуропаның 30 елінен ұлттық химиялық олимпиадалардың жеңімпаздары арасынан бітіруші түлектер мен жоғары сынып оқушылары ниет білдірді.
Нұр-Сұлтан қаласының ер балаларға арналған «Білім-инновация» лицейінің 11 сынып оқушысы Сейсенқұл Бақдәулет дәл осы Халықаралық Менделеев олимпиадасында жоғары нәтиже көрсетіп, қола медальға ие болды.
«Астана дарыны» орталығы бағы мен бабы қатар шапқан Бақдәулетті жүлдесімен құттықтайды және елордалық оқушымыздың халықаралық олимпиадаға қатысуына демеуші болған «ZERDELI» ақыл-ой дамыту мектебінің директоры Рысбек Мәуітке, «Bilim Foundation» ҚҚ президенті Айтмұхамбет Ерлан Аманжолұлына және ер балаларға арналған «Білім инновация» лицейінің директоры Пириев Эльбрус Камалұлына алғыс білдіреді.