2024 жылдың 11-12 қараша күндері елордада «Астана дарыны» дарынды балалар мен талантты жастарды анықтау және қолдау орталығы «Хабар» телеарнасының қолдауымен «ХХІ ғасыр көшбасшысы» зияткерлік сайысының қалалық кезеңін Spectrum халықаралық мектебінде өткізді.
Оқушылардың көшбасшылық қасиеттерін, танымдық және шығармашылық белсенділігін дамыту, ой-өрісін кеңейту мақсатын көздейтін зияткерлік сайыс екі тур бойынша өтті. Iріктеу кезеңіне қатысуға өтініш білдірген 39 оқушы алғашқы турда тест жазып, ең жоғары ұпай жинаған 12 оқушы ауызша турға қатысты.
Қорытынды кезеңде өз білім ордасының жас зияткерін қолдауға келген жанкүйерлер Spectrum халықаралық мектебінің акт залын лық толтырып, ерекше мерекелік көңіл күй сыйлады. Сайыс «Жас дарындар» гимнімен ашылып, жүргізуші, республикалық «ХХІ ғасыр көшбасшысы» зияткерлік сайысының финалисі Төлеуіш Мейірлан қатысушыларды салтанатпен ортаға шақырып, олардың танымы мен білімін бағалайтын сарапшыларды таныстырды.
Ауызша тур кезінде оқушылар өздерінің ойлау-дамыту деңгейін, қойылған сұрақтарға жылдам жауап беру, сахнада өзін ұстай білу мәдениеті мен қабілетін көрсетті.
Екінші турдың қорытындысы бойынша ең жоғары ұпай жинаған 5 финалист: Амангельдин Сардар (Қ. Мырза Әлі ат.Binom MЛ), Аяз Ардана (№52МГ), Айтбаев Алихан (Zerdeli International School), Нұрланқызы Айханым (№85МЛ), Айткеш Алмаз (№32МГ) «Астана дарыны» орталығының дипломдарымен марапатталып, қатысушыларға сертификаттар табысталды. Финалистер 2025 жылдың сәуір-мамыр айларында Алматы қаласында өтетін республикалық кезеңде (қорытынды) Астана намысын қорғайды.
Елордалық жас зияткерлерімізге сәттілік тілейміз!
