БҒМ Мемлекет басшысының дарынды балаларды қолдау жөніндегі тапсырмасын іске асыру аясында заңнамаға енгізілетін түзетулерді дайындады. Олар халықаралық пән олимпиадаларының жүлдегерлеріне жоғары оқу орындарына ҰБТ-сыз, яғни конкурстан тыс негізде білім алу үшін гранттар беруді көздейді, деп хабарлады Elorda.info.
Бұл туралы Білім және ғылым бірінші вице-министрі Шолпан Каринова мәлімдеді.
Бастысы біз халықаралық олимпиадалардың жеңімпаздары мен жүлдегерлері және оларды даярлаған педагог- жаттықтырушыларға да біржолғы ақшалай сыйақы төлеуді қарастырдық. Алтын медаль иегерлеріне — 1500 АЕК, күміс медаль – 1000 АЕК, қола медаль – 500 АЕК көлемінде ақшалай сыйақы тағайындау жоспарланып отыр, – деді ол.
Яғни алтын медаль алған жеңімпазға 4 594 500 теңге беріледі.
Күміс медаль алған оқушы 3 млн 63 мың теңге, ал қола медаль болса, 1 млн 531 мың теңгеге ие болады.
Еске сала кетсек, Қазақстанда 2022 жылдың 1 қаңтарында белгіленген 1 айлық есептік көрсеткіш (АЕК) 3063 теңгеге тең.